YOUTH FOR CHRIST MINISTRY

#AMANTII FI SIYAASA —
MACAAFNI QULQULLUUN MAAL JEDHA?

Amantiin (Kiristaanummaa) fi siyaasaan dhimma yeroo ammaa keessatti walitti dhufeenya cimaa qabaatan fakkaatu. Namoonni hedduun “Kiristaanonni siyaasaa keessatti hirmaachuu qabu moo hin qaban?” jedhanii gaafatu. Deebiin isaa salphaa miti; garuu macaafni qulqulluun haala ifa ta’een qajeelfama nuuf kenna.

1. UUMAMA FI KAAYYOO MOOTUMMAA

Macaafni qulqulluun mootummaa lafaa akka Waaqayyoon hayyamame ibsa:

Roomaa 13:1 → “Abbootii mootummaa hundumaa jala buluun dirqama; mootummaa Waaqayyotu dhaabe.”
Kana jechuun:
* Mootummaan badii to’achuuf, nagaa eeguuf dhaabbate
* Kiristaanonni mootummaa balaaleffachuu qofa osoo hin ta’in, kabajuu qabu
Garuu:
➡️ Mootummaan lafaa mootummaa Waaqayyoo miti
➡️ Kaayyoon isaanii adda adda dha

2. MOOTUMMAA WAAQAYYOO FI MOOTUMMAA LAFAA GIDDUU GARAAGARUMMAA

Yesuus ifatti dubbate:
*Yohaannis 18:36 → “Mootummaan koo mootummaa biyya lafaa miti”
👉 Kana irraa:
* Yesuus siyaasa keessa hin seenne
* Mootummaa samii irratti xiyyeeffate
Yesuus mootummaa Roomaa fonqolchuu hin yaanne; garaa namaa jijjiiruu irratti hojjete.
➡️ Barumsi guddaan:
Kiristaanonni garaa namaa jijjiiruu irratti xiyyeeffatu, aangoo siyaasaa irratti miti

3. “KAN QEESAAR QEESAARIIF…” — DAANGAA AMANTII FI SIYAASA*
Maatewos 22:21→ “Kan Qeesaar Qeesaariif kennaa, kan Waaqaa immoo Waaqayyoof kennaa”
Kun hiika guddaa qaba:
* Mootummaa → gibira, seera, kabaja
* Waaqayyoo → waaqeffannaa, amantii, jireenya hafuuraa
➡️ Kana jechuun:
Amantii fi siyaasni daangaa isaanii qabu; walitti makamuun rakkoo uuma

4. KIRISTAANONNI SIYAASA KEESSATTI QOODA FUDHACHUU QABUU?
Macaafni qulqulluun kallattii lama nu agarsiisa:
✔️ Waan gochuu qabnu:

* Seera mootummaa eeguu
* Nagaa deeggaruu
* Namootaaf kadhachuu
1 Ximotewos 2:1-2→ abbootii mootummaaaf kadhadhaa
❌ Waan irraa of qusachuu qabnu:

* Wal lolaa siyaasaa
* Garee addaan baasu
* Aangoo fi dantaa dhuunfaa hordofuu
2 Ximotewos 2:4→ “Namni waraana keessa jiru hojii biraatti hin makamu”
👉 Hiikni isaa:
Kiristaanonni hojii isaanii guddaa (Waaqayyoo tajaajiluu) dhiisanii wal lola siyaasaa keessa hin seenin

#a. Amantii fi siyaasa walitti makamuun balaa dha*

#Tetelestai”
(τετέλεσται) jechuun jecha Giriikii Kakuu Haaraa keessaa Yohannis 19:30 keessatti kan argamu yoo ta’u, dubbii torba Yesuus Kiristoos fannoo irraati dubbate keessa isa xumurati.
Hiika isaa
τετέλεσται (tetelestai) jedhu jecha Giriikii “teleō” jedhu irraa dhufe, hiikni isaas:“xumuru yookan “raawwachuu” ykn “guutuu gochuu” ykn “milkeessuu” jechuudha.
Tetelestai jechuun yeroo ammaa keessatti “perfect tense” waan ta’eef hiikni isaa:
👉 “Xumurameera” ykn “Guutummaatti raawwatameera” jechuudha.
Hiikni isa bal’inaan bara durii Giriikii jecha tetelestai jedhu akka armaan gadiitti itti fayyadamu ture:
1. Hojii xumurame guutummaatti raawwatamee
2. Liqiin guutummaatti kaffalame waan hafe tokko illee hin jiru
3. Kaayyoon milkaa’e wanti yaadame hundi raawwatame
#HiikaYesuusfannooirraatiyeroo_jecha “tetelestai” jedhu dubbate qabu :
A. Ergamni isaa lafa irra dhufeef xumurameera jechuudha
B. Raajiiwwan Waa’ee Isaaf dubbatamaan hundii raawwatamaniiru jechuudha
C. Hojiin fayyinaa guutummaatti xumurameera
Gabaabumatti “Tetelestai “ jechuun Xumurameera, guutummaatti raawwatameera, wanti hafe hin jiru.” Jechuudha!
Lammiisaaf Kabbadee (Luba)
Eebbifamaa

t.me//Youth4Christ1

WAAQAYYO TOKKICHA JECHUUN MAAL JECHUUDHA?
Caqasni kun (Keessa Deebii 6:4) amantii Yihudootaa fi Kiristaanotaa keessatti hundee guddaa yoo ta’u, hiikni isaa gadi fagoodha. Namoonni tokko tokko "Waaqayyo tokkicha" yommuu jedhamu akka waan barsiisa Sadan-tokkummaa (Trinity) haaluutti hubatu.

Haa ta'u malee, akkaataa hiika afaan jalqabaa (Ibrootaa) fi galumsa Macaafa Qulqulluutti madaallii isaa akkasitti ilaaluun ni danda'ama:

1. Hiika Caqasichaa (Maal jechuu dha?)

Kakuu Moofaa keessatti sabni naannoo Israa’el jiran hundinuu waaqayyolii baay’ee (polytheism) waaqeffatu turan. Caqasni kun kan dubbatameef:

Waaqa Tokkicha: Israa’eloonni Waaqa tokko qofa (Yahweh) akka waaqeffatan hubachiisuuf.

Unique (Adda): Waaqayyo uumama hundumaa irraa adda ta’uu isaa fi hir'ina kan hin qabne ta’uu isaa ibsuufi.

2. Sadummaa (Trinity) ni haalaa?

Deebiin isaa "Lakki, hin haalu" kan jedhu dha. Sababiin isaas:

A. Jecha "Tokkicha" (Echad) jedhu:
Afaan Ibrootaatti caqasa kana irratti jecha "Echad" jedhutu gale. Jechi kun tokkummaa qaama baay’ee of keessaa qabu (composite unity) agarsiisuu danda’a.

Fakkeenya: Uumama 2:24 irratti, "Dhiirri... haadha manaa isaattis in maxxana; isaan lachanuus foon tokko (echad) in ta'u" jedha. Namni lama (dhiiraa fi dubartii) uumamaan gargar ta'anis, tokkummaa isaaniitiin "echad" jedhamu.

Fakkeenya: Lakkoobsa 13:23 irratti, iji waynii baay'een hurbuu tokko (echad) jedhamee waamameera.

Yoo Waaqayyo "tokkummaa tokko qofaa" (absolute mathematical unity) ibsuu barbaadeera ta'ee, jecha Ibrootaa "Yachid" (isa hiikni isaa "qeenxee/tokkicha" [only/solitary] jedhu) fayyadama ture. Garuu, Caaffanni Qulqullaa'aan "Echad" fayyadame.

B. "Elohiim" (Maqaa Waaqayyoo):
Caqasuma kana keessatti jechi "Waaqayyo" (Elohiim) jedhu hiika "baay'ina" (plural) of keessaa qaba. Kunis jalqabumaa iyyuu tokkummaa Waaqayyoo keessa icciitiin qaamotaa akka jiru akeeka.

3. Kakuu Haaraa fi Caqasa Kana

Yesus Kiristos "Waaqayyo tokkicha" ta’uu isaa matumaa hin haalle; inumaa caqasuma kana itti fayyadamee barsiiseera.

Maarqos 12:29: Yesus deebisee "Inni hundumaa irra caalu, “Dhaga'i, yaa Israa'el! Gooftichi Waaqayyo keenya kophaa isaa gooftaa dha.” (Mar 12:29) jedhe.

Haa ta'u malee, Yesusiin amanuu fi Hafuura Qulqulluu qabaachuun "Waaqa tokkicha" mormuu akka hin taane barsiiseera. Sababni isaas Abbaan, Ilmii fi Hafuurri Qulqulluun uumama (Nature/Essence) isaaniitiin tokko waan ta'aniifi.

Caqasni kun hundee Sadan-tokkummaa ti malee gufuu miti.

Kiristaanonni Waaqa sadii hin waaqeffatan; Waaqa tokkicha qaama sadiin of mul'isetti amanu.

Keessa Deebii 6:4 tokkummaa uumama Waaqayyoo (One Being) jabeessa; Kakuun Haaraa ammoo adda addummaa qaamotaa (Three Persons) ifa godha.

Kanaaf, caqasni kun Sadan-tokkummaa hin haalu; qooda sanaa, Waaqayyo inni nuyi amannu Waaqa dhugaa isa tokkicha ta'uu isaa mirkaneessa.

Yaada Gabaabaa: "Tokkicha" jechuun Sillaasee keessatti "Tokkummaa uumamaa" agarsiisa malee, qaama tokko qofa jechuu miti.

Bona Adugna yoo hordoftan waliin macaafa qulqulluu ni qu'anna. Barumsa baayyee itti gammaddanis ni argattu.
Share waan gootaniif eebbifamaa🙏

Maddi: https://www.facebook.com/share/1E5W1iT6PG/ follow yoo gootan ibsa Macaafa Qulqulluu fi barumsa gaggabaaboo ni argattu!

t.me//Youth4Christ1

Ergama keenya
"Yeeyyiiwwan mana keessaa".
Dubbisa Macaafa Qulqulluu; 1 Phexros 4:7-11

"... Hunda caalaa jaalalli cubbuu baay'ee waan haguuguuf jaalala cimaa waliif qabaadhaa."
— 1 Phexros 4:8

Haaloo qabachuun akka nama “Yeeyyii xixiqqoo mana keessatti guddisuuti” jechamni xiqqoon kun sirrii akka ta'e nan amana. Sababni isaa immoo yeeyyiin bineensa hamaa bosona keessa jiraatu yoo ta'u, horii manaa dabalatee lubbu qabeeyyii miidhuu kan danda'uudha. Haaloo qabachuu fi jibbi immoo keessa namaatii madduudhaan suuta suuta jireenya namaa kan dhuunfatu yeeyyii xixiqqoo jireenya namaa mancaasaniidha. maatiin keenya haaloo qabachuufi jibbii summii jireenya namaa nyaatee balleessu akka ta’eefi dhukkuba qoricha hin qabne akka ta'e yeroo dubbatan dhaga’eera. Bineeldonni fokkisoo fi xixiqqoo ta’an kun, yoo nuti nyaachisuu fi bashannansiisuu hayyamne, gatittii keenyarra ol ba’u. Dhugumatti haaloo qabachuu fi jibbuun gadi nama deebisee jireenya namaa yeelalcha. Gaabbii karaa kamiin keessaa ba'uu hin dandeenye keessas nama galcha.

Jibbaa fi Haaloo qabachuu jalaa of baasuu kan dandeenyu akkamitti? Ergamaan Pheexiroos foormulaa sirrii jibbaa fi haaloo ittiin ajjeesan nutti hima.

Phexros xalayaa kiristaanota Eeshiyaa Xiqqootti booji’amanii rakkatanii fi cunqurfamaa turanitti barreesse, jireenya isaanii keessatti moodelli guddaan Yesuus Kiristoosiin akka ta'e yaadachiisuudhaan isa fakkaadhaa jiraadhaa jedha. Dhuguma isatti yoo jiraatan bakka jibbuufi haaloo qabachuu; jaallachuufi dhiifama gochuudhaan akka isaan mullatan ni barsiisa. Isa kanaaf immoo madda jaalalaa fi dhiifamaa isa ta'e Yesus Kiristoositti akka maxxanan gorsuudhaan isaaniif barreessa. Maddi jaalalaa fi dhiifamaa Yesuus kiristoosiidha. Keessa keenyatti yommu gooftaa keenya jaallachuun guutamnu warra kaan jaallachuufi dhiifama gochuufiin nurraa mullataa adeema.

Akkuma Yesus dhiifama nuuf godhe, nutis warra nutti balleessanii fi warra nu miidhaniif dhiifama gochuu qabna. Nama irratti haaloo qabachuu fi jibbuu dhiisnee jaalalaafi dhiifama gochuutti guddachuu qabna. Dhuguma harra kana yoo shaakaluu eegale dhibeewwan akka summii jabaa fi yeeyyii xixiqqootti keessa keenya nyaataa adeemaniif daawqaa argachuu keenyadha. Nagaa, boqonnaa, gammachuu fi aara-galfii guddaan kan nu keessa guutu yeroo jaalalaa fi dhiifama garaa guutuudhaan namootaaf taasisnuudha.

Akkamitti akkas gochuu dandeenya?
✅ Sagalee Waaqayyoof abboomamuun daangaa malee wal jaallachuun dhiifama waliif  gochuu (Maatewos 5:43-45; 18:21-22), Pheexiroos ergaa isaa keessatti akkas jedha:
Hunda caalaa jaalalli cubbuu baayʼee waan haguuguuf, baayʼee wal jaalladhaa;
✅ Yesuus Kiristoosiin fakkeenya fudhachuu
✅ Waaqayyo hafuura jaalalaafi dhiifamaan akka nu guutu kadhachuudha.

Phexros ibsa jaalalaa tarreessuun barreesseera:
▶️ wal simachuu ykn gaarummaa walitti argisiisuu,
▶️ Wal kabajuufi iddoo waliif kennuu
▶️ kennaa nuuf kennametti fayyadamuun wal tajaajiluu, warra kaan eebbisuu fi ijaaruu.
▶️keessummoota simachuufi jaalala itti agarsiisuu fa'i.
Akkuma Pheexiros fi bartootni biroon Yesus irraa baratan, namoota kaaniif dhiifama yommuu goonu, dhiifamni Waaqayyo akka nuuf godhamee fi jaallatamuu keenya argisiisa. Wal jaallachuufi wal kabajuu, dhiifama waliif gochuu keenyaanis gammachuudhaan akka jiraannu nu taasisa.
Qajeelfama
✝️Harra namoota nu gaddisiisaniif haa dhiisnu,
✝️ warra nu jibban haa jaallannu
✝️ jaallachuu keenya itti haa beeksisnu
✝️ Guyyaa guyyaadhaan namootaaf dhiisuufi jallachuu keenya haa madaallu

▶️Haa Kadhannu
Gooftaa Yesuus akkuma ati nu jaallattee dhiifama nuuf goote namoota biroof dhiifama gochuu fi jaallachuu akka dandeenyu nu gargaari. Hafuura qulqulluudhaan jaalalaafi dhiifama gochuu akka dandeenyu humna nuuf kenni. Maqaa Yesuusiin Ameen✝️🙏

t.me//Youth4Christ1

“Yesus irra-daddarbaa keenyaaf du'atti dabarfamee kenname; qajeelummaa akka argannuufis du'aa kaafame.” (Rom. 4:25).

Happy Easter!
Join us t.me//Youth4Christ1


Share for others!
Happy Easter!

Taateewwan fiilmii "The Passion of The Christ" jedhu, duubaan uumaman

Taateewwan yeroo fiilmiin kun hojjetamu raawwataman, seenaa fiilmichaa gadi haal hin taaneen, taateewwan ajaa'ibsiisoo, sodaachisoo fi waantoota dinqii jedhamntu turan.

1. Taphataan/Taatoon Fiilmichaa Bakakkaan rukutamuu!

Yeroo fiilmiin kun waraabamu, Taatoon fiilmichaa Jim Caviezel Bakakkaan rukutameera. Kan nama ajaa'ibu garuu, miidhaa cimaa tokko utuu irra hin gahin hafuu isaati. Dabalataanis, gargaaraan daayireektara fiilmichaa Jaan Misheeliini yeroo adda addaa lama Bakakkaan rukutameera.

2. Gidiraa fi Miidhaa Qaamaa Jim Caviezel

Jim Caviezel fiilmii kanaaf jedhee, dhiphina dhugaa keessummeessera:

2.1 • Saggoon bu'uu: Fannoo 68 Kg baatee utuu socho'aa jiruu, Saggoon isaa sigigaatee bu'eera. Taateen kunis, fiilmii sana keessatti hammatameera.

2.2• Dhukkuba Sombaa(Pneumonia): Bakki fiilmiin kun itti waraabame baay’ee qorra waan turee fi Taatoon sun irra caalaa qul'aaisaa waraabamaa waan tureef, sababa qorraatiin dhukkuba sombaaf saaxilamee ture.

2.3 • Infeekshinii Gogaa: Agarsiisa Reebichaatiif Meekaappii(Makeup) jedhamanii hojjetamanii turan, sa'atii dheeraaf qaama isaarra waan tureef, gogaa isaarratti madaa guddaa fi infekshinii cimaa itti fidee ture.

2.4 •Reebicha dhugaatiin rukutamuusaa!

Taatee reebichaa sana, bakka Waraana Roomaa bu'anii taatoowwan isa reeban sun, dogoggoraan dhugaamatti, Jiim Cavezel yeroo lama reebaniiru (rukutaniiru). Sababa kanaatiinis, madaa guddaan 35cm dheeratu, dugda isarratti hafeera.

3. Meekaappii Sa'aatii 7 'f ture.

Jim Caviezel madaa fi reebicha isaatiif kan ta'u, Meekaappii dibachuuf, guyya guyyaatti sa'aatii 7 hanga 10 taa'uu qaba ture. Yeroo tokko tokko Meekaappiin isaa sun akka irraa hin badneef(tabalaashofneef) halkan guutuu osoo hin rafin akkuma taaʼetti buluuf dirqamaa ture. Sababa meekaappii ijasaa tokko irratti hojjetameefis, yeroodhaaf agartuun isaa aguugamee ture.

4. Amantii jijjiirrachuu namootaa

Yeroo fiilmiin kun hojjetamu, haala sochii hafuuraa irraa kan ka'e, jireenyi hojjettoota fiilmii kanaa hedduun jijjiiramera. Fakkeenyaaf:

• Isaan keessaa tokko, Amantii "Waaqayyoon hin jiru!" (Atheist) jedhu kan ture yeroo ta'u, fiilmiin kun erga xumuramee booda garuu, amantii Kiristaanaa fudhate.

• Taatoo loltuun Roomaa Yesusiin reebu tokko ta'ee kan taphate, Taatoon Luca Lionello jedhamu, jalqaba hordofaa amantii kan biraa ta’us, adeemsa tuqamee, Kiristaanummaa fudhateera.

5. Harka Mel Gibson

Fiilmicha keessatti harki Yesuus fannoo irratti mismaaraan rukutamee taateen agarsiisu, kan Taatoo fiilmichaa osoo hin taanee, kan Daayireektara Fiilmichaa, Mel Gibson ti. Kanas kan godhe, ergaa "Yesus akka fannifamu kan godhe, cubbuu kootisi!" jedhu dabarsuudhaaf akka ta'e dubbateera.

6. Rakkoo maallaqaa

Istuudiyoowwan fiilmii gurguddoon, fiilmiin kun baay'ee wal falmisiisaa waan ta'eef, maallaqaan gargaaruuf fedhii hin qabanne turan. Kanaaf, Daayirektarri fiilmichaa Mel Gibson maallaqa ofii isaa keessaa doolaara miiliyoona 30 itti baasee fiilmii kana waraabsise. Dhumarrattis, Fiilmiin kun doolaara miiliyoona 600 ol kan argate yeroo ta'u, seenaa keessatti, fiilmiiwwan yeroo kamiyyuu caalaa galii guddaa argatan keessaa tokko taasiseera.

Jim Caviezel waa'ee fiilmii kanaa yeroo dubbatu, "Fiilmiin kun anaaf hojii osoo hin taane, imala hafuuraa ture." jedhe. Qormaanni yeroo fiilmiin kun hojjetamu mudate, Fiilmicha caalaatti dhugaa fi dhiibbaa akka qabu isa taasiseera.

(Maddi: Toora Miidiyaa Hawaasaa kanaati).

Hubachiisa! Fiilmiin kun Fiilmii "Jesus" Jedhuun wal adda yeroo ta'u, Jesus kan jedhu guutuu Jireenya Yesuus Biyya lafaarraa kan dubbatuudha. The Passion of Christ kun garuu, sa'atiiwwan 12'n dhumaa, turtiisaa Fannoo fi deemsa isaa gara fannoo qofa irratti xiyyeeffata ture.

Dhugaan nama ajaahibu tokko garuu, Waantota fiilmiitiif, Makeup dhaan fakkeessuudhaaf yaalaman sanaa fi reebichaawwan hamoo fiilmiicha keessatti hammachiisuun ulfaatu sana garasitti Yesuus Aarsaa bakka hin bu'amne, nu ilmaan namootaaf nuuf kaffaleera.

Baga Ayyaana Yaadannoo Fannoo Yesuus Kiristoosiin, nagaan isin ga'e! Good Friday!

t.me//Youth4Christ1

https://youtu.be/Z_je0Cvzwo0?si=j7SS6NwcpGlRtGJH


Faarfannaa kanatti akka baayyee gammaddan abdiin qaba. Ittiin eebbifamaa! akkasumas immoo YouTube obboleessa keenyaa subscribe gochuun warra bira hin geenyeefis share gochuun wajjin tajaajiluu hin dagatinaa!

Iddoon jannata Eeden yookaan iddoon Waaqayyo eegsise sun Addaam fahaaf akka iddoo qulqulluu qulqullootaati; kana jechuun iddoo itti isaan Waaqayyo waliin wal arganidha. Argamni Waaqayyoo iddoo sana keessa ture, iddoo argama Waaqayyootti Kiruubeelonni akka argaman irra deddeebiin macaafni qulqulluun in hubachiisa. Kanaaf isaan immoo qajeelummaatti hirdhataniiru waan taheef, argama isaa duraa akka fagaatan godhame. Iddoon qulqulluu qulqullootaa calluma jedhamee hin seenamu; hangafa lubootaatu erga aarsaa dhiifama cubbuuf godhamu baasee waggaatti al tokko gaafa guyyaa araaraa (At the day of atonement) iddoo sanatti argama. Akkuma kanaa Addaam fahaas iddoo Waaqayyo argamutti cubbuu waliin yeroo hundumaa argamuun isaaniif waan hin dandahamneef iddoon sun biillaa ibiddaa walirra naannahuufi kiruubeelotaan eegame. Jannatni Eedenis deebitee namoota biyya lafaa kana irra jiraniin hin argamne. Iddoon dhaaba Eeden kun naannoo Meesoopotaamiyaa yookaan naannoo Iraan hardhaa akka ture macaafni qulqulluun nu hubachiisa. Haa tahu malee kufaatii namaa booda Waaqayyo dhaaba sana eessa akka inni dhaqate beekamaa miti.

Barnoonni kun koollejjii Tiyooloojii Bayyaannannee waliin tahuun kan isiniif kennamudha. Caalaatti barachuuf keessaan nu qunnamaa! Warri fagoo jirtan karaa toora telegram isin qaqqabsiifna.

Bayanane dha

t.me//Youth4Christ1

5. Qoramuu (Deebii Gaaffii 15)
Falmii isaanii: "Waaqayyo hin qoramu (Yaaq 1:13), Yesuus qorameera."jedhu

Deebii Macaafa Qulqulluu:
Yesuus kan qorame namummaa isaatiini. Seexanni foon isaa dadhabsiisuuf yaale.
Ibroota 4:15: "Inni karaa hundumaan akkuma keenya qorameera, garuu cubbuu tokko illee hin hojjenne."
Yaaqoob 1:13 irratti "Waaqayyo hin qoramu" yeroo jedhu, Waaqayyo keessa kajeellaan cubbuu (sinful nature) waan hin jirreef, cubbuudhaan hin harkifamu jechuu dha. Yesuusis qorumsa Seexanaa ni injifate malee, cubbuudhaan hin mo'amne.

Guduunfaa:
Gaaffiileen kun hundumtuu dhugaa tokko dagachuu irraa maddu: Yesuus Kiristoos Waaqa qofa miti, Nama qofas miti. Inni tokkummaa qaamaa (Hypostatic Union) keessatti Waaqa guutuu fi Nama guutuudha.
Akka namaatti ni beela'e; akka Waaqaatti kumaatama nyaachise.
Akka namaatti ni rafe; akka Waaqaatti bubbee ajaje.
Akka namaatti ni du'e; akka Waaqaatti du'a mo'ee ka'e.
Kanaafuu, ragaaleen dhiyaatan kunniin namummaa Yesuus mirkaneessu malee, Waaqummaa isaa hin haalan.

Maddi: https://www.facebook.com/share/1E5W1iT6PG/ follow yoo gootan ibsa Macaafa Qulqulluu gaggabaaboo ni argattu!

“... bara inni Waaqayyo akka isa geggeessu barbaadaa ture hundumaatti Waaqayyo immoo hojii isaa wal in qixxeesseef.”
— 2Sen. 26:5

EENYUMMAA YESUUS IRRATTI GAAFFIIWWAN MUSILIIMOTAA MACAAFNI QULQULLUUN YOMMUU DEEBISU!
Gaaffiiwwanii fi falmiiwwan kunniin kan maddan hubannoo bu’uuraa amantii Kiristaanaa isa "Foon Uffachuu" (Incarnation) jedhu wallaaluu ykn dagachuu irraayi.
Macaafni Qulqulluu ifatti kan barsiisu: Yesuus Kiristoos Waaqa guutuu dha, akkasumas Nama guutuu dha.

Yohaannis 1:1 — "Jalqaba Sagalichi ture... Sagalichis Waaqayyo ture." (Waaqummaa isaa).
Yohaannis 1:14 — "Sagalichis foon ta'e, ... nu gidduus buufate." (Namummaa isaa).
Namni gaaffii kana gaafate, "Waaqummaa" Yesuus qofa fudhatee, "Namummaa" isaa immoo Waaqummaa isaa balleessuuf itti fayyadama. Kun dogoggora. Yesuus nama ta'uun isaa Waaqa ta'uu isaa hin hambisu.
Mee qabxiilee 15n kana bakka gurguddoo shanitti qoodnee Macaafa Qulqulluun haa "hunkuteessinu" (deebii gahaa haa kenninu):

1. Waaqayyo ni dhalataa, ni rafaa, ni nyaataa, ni beela'aa? (Deebii Gaaffii 1, 9, 10, 11, 12, 13, 14)
Falmii isaanii: "Waaqayyo hin dhalatu, hin rafu, hin nyaatu, hin beela'u, saala hin qabu. Yesuus garuu kana hunda godheera. Kanaaf Waaqayyo miti."jedhu

Deebii Macaafa Qulqulluu:
Eeyyee, Waaqayyo uumamaan kan hin dhalanne, kan hin rafnee fi kan hin beelofnedha. Garuu, Ilmi Waaqayyoo (Sagalichi) sanyii namaa cubbuudhaan badee jiru fayyisuuf jecha, ulfina isaa dhiisee bifa namaa uffate (Namummaa fudhate).
Filiphisiiyus 2:6-7: "Inni bifa Waaqayyootti utuu jiruu... ulfina Waaqayyo wajjin wal qixxee ta'uu... hin lakkoofne; kanaa mannaa... bifa garbichaa in fudhate; fakkaattii namaattis in dhalate."
Kanaafuu:
Akka Waaqaatti: Inni bara baraan jiraataa dha (Yoh 1:1, 8:58), addunyaa kana hunda kan uume dha (Qol 1:16).
Akka Namaatti: Ni dhalate (Luq 2), ni rafe (Mar 4), ni beela'e.
Maaliif? Akkuma keenya foon uffatee, dhiphina keenya hunda dhandhamee, bakka keenya du'uufi (Ibroota 2:14-17). Foon uffachuun isaa jaalala isaa agarsiisa malee Waaqummaa isaa hin hir'isu.

2. Waaqayyo Namaa? (Deebii Gaaffii 2, 3, 4, 5)
Falmii isaanii: "Waaqayyo nama miti (Lak 23:19), hafuura (Yoh 4:24), ijaan hin argamu. Yesuus garuu nama." Jedhu

Deebii Macaafa Qulqulluu:
Lakkoofsa 23:19 ("Waaqayyo nama miti...") kan jedhu, Waaqayyo amalaan akka namaa sobduu fi gaabbaa miti jechuu dha malee, Waaqayyo nama ta'uu hin danda'u jechuu miti.
Waaqayyo Hafuura: Dhugaa dha. Garuu Waaqayyo inni ijaan hin argamne sun, akka namni isa arguuf Yesuus Kiristoosin of mul'ise.
Qolosaayis 1:15: "Kiristoos, bifa Waaqayyo inni ijaan hin argamne ittiin namatti mul'atuu dha."
Yohaannis 14:9: Yesuus, "Namni ana arge Abbaa argeera" jedhe.
Kanaafuu, Yesuus "Fakkaattii Waaqayyoo" qofa osoo hin taane, Waaqayyo isa ijaan hin argamne, fooniin mul'atedha (1 Xim 3:16).

3. Beekumsaa fi Humna (Deebii Gaaffii 7, 8)
Falmii isaanii: "Yesuus guyyaa dhumaa hin beeku (Mar 13:32), ofii isaatiin homaa gochuu hin danda'u (Yoh 5:30). Kanaaf Waaqayyo miti."jedhu

Deebii Macaafa Qulqulluu:
Yeroo Yesuus lafa irra ture, fedha isaatiin aangoo fi beekumsa Waaqummaa isaa hunda fayyadamuu dhiisee, akka namaatti Abbaa isaaf ajajameera. Kun "Gad of deebisuu" (Kenosis) jedhama.
Akka Namaatti: Guyyicha hin beeku, Abbaa irratti hirkata.
Akka Waaqaatti: Waan hundumaa beeka. Bartoonni isaa, "Ati waan hundumaa akka beektu... nuyi hubanneerra" jedhan (Yohaannis 16:30, 21:17).
Yohaannis 5:30 irratti "Ofii kootiin homaa gochuu hin danda'u" kan inni jedheef, Inni fi Abbaan tokko waan ta'aniif (Yoh 10:30), fedha Abbaa irraa adda ba'ee waan biraa hin hojjetu jechuu dha malee, humna hin qabu jechuu miti.

4. Du'a (Deebii Gaaffii 6)
Falmii isaanii: "Waaqayyo hin du'u, Yesuus du'eera."jedhu

Deebii Macaafa Qulqulluu:
Duuti Kiristoos dhimma bu'uuraa Kiristaanummaa ti.
Eenyutu Du'e? Foon Yesuus uffate sanatu du'e. Waaqummaan (Divinity) hin du'u, hin awwaalamus.
Garuu qaamni foonii sun qaama Waaqayyoo waan tureef, Macaafni Qulqulluu, "Waaqayyo dhiiga isaa dhangalaasee waldaa kiristiyaanaa bitate" jedha (Hojii Ergamootaa 20:28).
Duuti Yesuus garuu dhuma hin turre; Inni du'a mo'ee ka'eera. Waaqayyo du'a mo'ee ka'uun isaa Waaqa ta'uu isaa mirkaneessa (Roomaa 1:4).

Sekondii 70 qofa qabu!
================
Corrie ten Boom dubartii biyya Nederlandiiti. Maatiin ishee guutuun kiristaana gooftaaf of kennanidha. Naaziin Jarmanii osoo biyyattii hin weerariin dura Yihudoota 140,000 oltu achi keessa jiraata ture. Jibbi, gara jabummaanii fi ajjechaan Hitler Israa'elootaaf qabu daran cimaa deeme. Biyyi Dutch jedhamtu kunis harka Naaziitti yoo kuftu xiyyeeffannoo guddaan Yihudoota adamsanii ajjeesuu ture.

Jalalli maatiin"Ten Boom" Kiristoosiif qaban addadha. Obboloonni Yihuudotaa gara jabummaa guddaan yeroo ajjeefaman ta'anii ilaaluu hin dandeenye. "Guddinni mana keenyaa xiqqaatus, balballi isaa garuu obboloota keenyaaf bal'aadha" jechuun namoota adamsaman dhoksuu eegalan. Bara 1942tti bakka ciisichaa Corrie biraan lafa jalatti iddoo dhokannaa dhooksaan hojjetan. Leenjiin namoota dhokfamaniif kennan. Akkamitti akka of baraaruu danda'an sirritti shaakalchiisan.

Dafanii holqa sana seenuuf sekondii 70 qofatu kennamaaf. Yeroo kanatti hundi isaanii da'oo dhokannaa keessatti argamuun dirqama. Yeroo ergamtoonni Naazii Yihudoota barbaacha irra deemanii balbala rukuchuu jalqaban bilbilli mana keessaa dafanii akka baqataniif ni bilbilama.

Waggoota 2 oliif akkasitti obboloota Yihudii 800 ol dhoksan. Guyya tokko garuu namni tokko isaan saaxile. Naazonni dhufanii manicha weeraran. Maatiin "Ten Boom" hunduu mana hidhaatti guuraman. Corrie fi obboleettiin ishee Beisten mana hidhaa biyya jarmanii Ravensbruck jedhamutti hidhaman. Dararama guddaatu isaan irra ga'e. Guyyaa 10n booda abbaan isaanii obbo Casper ni boqotan. Cichanii abdii Waaqayyoo karaa macaafa qulqulluu isaaniif kenne amanan. Ta'us gidiraa, dhiphinnii fi beelli isaanitti cime.

Waggaa muraasa booda Beisten ni boqotte. Osoo hin du'in dura garuu Corrienitti waan tokko himte. "Waggaan haaraa osoo hin dhufiin dura mana hidhaa kanaa ni baata. Gaafa asi baatu garuu jaalalli Waaqayyoo dukkana limixii kanarra guddaa akka caalu dhugaa ba'i" jetteen.

Akkuma Beisten jetteen Corrien mana hidhaa ni baate:
1. Waggota 30f biyyoota 60 irra naanna'uun jalala Yesus dhala nama hundaaf qabu labsite.
2. Loltuu obboleetti ishee fi ishee irratti yakka daangaa hin qabne dalageef dhiifama goote.
3. Guutummaa ardilee irratti Yesus Kiristoos gooftaa akka ta'e himte.

Kunis jira! Mee waan irraa barattan katabaa! Seenaa kanan walfakkaatu macaafa qulqulluu keessaa kan eenyuu yaadattu?

Madda:The Hiding Place: The Triumphant True Story of Corrie Ten Boom 1971.
Afaan Oromootti hiikee barreesse!
Bona Adugna

t.me//Youth4Christ1